من مكتبة الشاعر السر دوليب ( مسامحك يا حبيبي )

مسامحك يا حبيبي
-----------------------------------------


مسامحك يا حبيبي مهما قسيت علي
قلبك عارفو ابيض و كلك حسن نية


و ما خطرت لقلبي سلوى تحيدو عنك
ما ممكن اعاتبك و ياخذ خاطري منك
أنا عارف خصامك و غضبك في كلامك
ما من جوة قلبك كله على لسانك
مسامحك يا حبيبي ...............


و أسال عني طيفك و ذكراك هم شهود
و ياما إشتقت ليك و رجيتك لي تعود
و حشتني الإبتسامة ..و عيونك بي كلامها
تداري في إشتياقها و تفضح لي غرامها
مسامحك يا حبيبي.............


سيان عندي عدلك او جورك علي
تكابر او تداري حبك باقي لي
بترجع لي تاني تسألي عن مكاني
تجدني زي ما كنت زايد في حناني
مسامحك يا حبيبي.............


ظلموني القالو عني غيرني البعاد
و حيات نور جمالك زاد البي زاد
و اصبح شوقي اكتر..و حبك عندي اكبر
أملي في هواك نامي و لسه أخضر
مسامحك يا حبيبي...............



**************